Merħba fil-Qalba tal-Festa

Il-viżjoni tagħna hija waħda mnebbħa mill-imħabba u d-devozzjoni lejn Ommna Marija tal-Karmnu, li għalina mhix biss figura spiritwali, iżda wkoll omm u għajn ta’ għajnuna f’kull stadju tal-ħajja. Aħna nemmnu li l-festa u dak kollu li jdawwarha mhumiex biss ġranet ta’ ċelebrazzjoni, iżda mumenti qaddisa li jgħaqqdu qalb u ruħ ta’ poplu ma’ dak li huwa sagru, sabiħ u etern.

​

Il-missjoni tagħna hija li nkomplu nkabbru din id-devozzjoni, b’mod speċjali fost iż-żgħażagħ u l-ġenerazzjoni li qed tikber, sabiex dak li wirtu minna l-antenati tagħna ma jintilifx, imma jissaħħaħ. Fuq l-ispalla tagħhom inbnew festi, tradizzjonijiet u armar li llum huwa ġojjell tal-kultura tagħna. Huma, b’qalb mimlija fidi u dedikazzjoni, tawna patrimonju li rridu nieħdu ħsiebu u nkomplu nagħtuh ħajja.

​

Aħna nħarsu lejn il-festa u l-ambjent Karmelitan mhux biss bħala wirt li għandna napprezzaw, iżda bħala mezz ta’ evanġelizzazzjoni, ta’ għaqda u ta’ mħabba lejn Alla. Għalhekk, permezz ta’ attivitajiet reliġjużi, edukattivi u komunitarji, noffru spazju fejn kull persuna – żgħażugħ, adult jew anzjan – tista’ tħoss ruħha milqugħa, u toħroġ b’sens akbar ta’ fidi u identità.

​

Fl-istess waqt, nagħtu każ u nipproteġu b’rispett kbir lill-voluntiera, artisti u ħaddiema li b’mod sieket u dedikat ilhom snin twal jaħdmu fuq l-armar, l-istatwi, in-nar, il-mużika u kull dettall ieħor li jagħmel il-festa tagħna daqshekk għażiża.

Aħna nemmnu li l-festa mhijiex biss ċelebrazzjoni ta’ ġurnata, imma mixja sħiħa ta’ fidi, tradizzjoni u kultura li għandna ngħożżu u ngħadduha 'l quddiem b’mod għaqli, ħabrieki u b’rispett lejn il-passat, il-preżent u l-futur.